Түркмөнстандын президенти Сердар Бердымухамедов башкаруусунда биринчи жолу Түркияга расмий сапар жасады. Анкарага келген лидер алгач Ататүрктүн күмбөзүнө жана 2012-жылы анын атасы, өлкөнүн экинчи президенти Гурбангулы Бердымухамедовдун катышуусунда ачылган акын Магтымгулынын эстелигине зыярат кылды. Андан соң түркмөн-түрк бизнес форумунун ачылышына катышты. Иш-чарадан кийин Аксарайда Түркиянын президенти Режеп Тайып Эрдоган менен жолугушту. Эки өлкөнүн мамлекет башчылары айыл чарбадан тарта БУУнун эл аралык кызматташуудагы ролунун маанилүүлүгүнө чейин мүмкүн болгон бардык темаларды талкуулашты. Ал эми делегацияларынын сүйлөшүүлөрүнүн негизги темасы түркмөн жаратылыш газы менен электр энергиясын Түркияга өткөрүү болду. Бир топ тармактарда кызматташуу боюнча келишимдерге кол коюлду.
Сүйлөшүүлөрдүн жыйынтыгында Бердымухамедов Эрдоганга Гардаш аттуу түркмөн алабай күчүгүн белекке берди. Жооп катары ага кангал тукумундагы күчүк берилди.