Россиянын ФСБсынын Ростов облусундагы чек ара кызматынын имаратында өрт чыгып, күйүүчү май куюлган контейнерлер жарылганын облус жетекчиси Василий Голубев билдирди.
Өрттүн келип чыгышына имараттын ичиндеги электр зымдарынын кыска туташуусу себеп болгондугу аныкталган. Өрттүн жайылышы күйүүчү-майлоочу майлар салынган контейнерлердин жарылуусуна алып келген. Губернатордун айтымында, өрттүн аянты болжол менен 800 чарчы метрди түзүп, эки дубал ураган.
Голубев белгилегендей, бир адам жаракат алып, орто оор абалда ооруканага жаткырылган. Коңшулаш көп кабаттуу үйлөрдүн тургундары көчүрүлгөн.
РФнын ФСБсынын Ростов облусундагы чек ара көзөмөлүнүн аймагында 16-мартта өрт чыккан. Күбөлөрдүн айтымында, имаратта өрт чыкканга чейин жарылуу болгон.
