Казакстандын Талды-Корган облусунда камакта жаткан Эрмек Маркабаевдин соту 27-октябрга жылдырылды. Алмата облусунун Каскелен райондук соту соттук отурумду онлайн түрүндө жүргүзүп жатат. Аны менен жолугушуу укугуна жактоочусу, келинчеги жана агасы ээ. Алматадагы тарапташтары маалымдагандай, Эрмек Маркабаевдин абалы жакшы.
Ал үстүбүздөгү жылдын 6-июнунда Алмата облустук полициясы тарабынан кармалган. Кармоо учурунда полиция кызматкерлери наркотикалык затты чөнтөгүнө салып жатканы видеого түшүп калган. Ал Алматадагы “Алтын-Орда” базарынын директорунун орун басары болгон. Өткөн жумада Жогорку Кеңештин “Ынтымак” фракциясынын лидери Марлен Маматалиев анын бошотулушун талап кылса, депутат Балбак Түлөбаев Казакстандын президенти Касым – Жомарт Токаевге кат жазган.