Россия менен Кытайдын ортосундагы мамилелер азыркы дүйнөлүк тартип үчүн өтө маанилүү. Бул тууралуу Кытайдын төрагасы Си Цзиньпин Москвадагы мамлекеттик сапарынын экинчи күнүндө Россиянын президенти Владимир Путин менен сүйлөшүүлөрүндө билдирди.
Соода жөнүндө
Путин өз кезегинде эки өлкөнүн ортосундагы соода байланыштары өсүп жатканын белгилеп, Украинадагы кризисти тынчтык жолу менен жөнгө салуу боюнча Пекиндин сунуштарын жогору баалады.
Путин белгилегендей, Кытай Россиянын алдыңкы тышкы соода өнөктөшү позициясын бекем кармап турат. Быйылкы жылы Россия Федерациясы менен Кытай соодасынын көлөмү 200 миллиард доллардан ашаары күтүлүүдө.
Россиянын президенти Кытай экономикасынын энергетикалык ресурстарга болгон суроо-талаптарын канааттандырууга жөндөмдүү экенин кошумчалады.
Украинадагы жаңжал тууралуу
“Кытайдын Украина боюнча тынчтык планынын көп пункттары россиялык ыкмалар менен шайкеш келет жана алар Батышта жана Киев ага даяр болгондо тынчтык жолу менен жөнгө салуу үчүн негиз катары алынышы мүмкүн”,-деген Путин Кремль азырынча мындай даярдыкты байкай электигин кошумчалады.
Өз кезегинде Си Цзиньпин Пекин украин маселеси боюнча объективдүү жана калыс позицияны карманып, элдешүүгө жана сүйлөшүүлөрдү калыбына келтирүүгө жигердүү көмөктөшөөрүн, тынчтыкты жана диалогду жактай турганын баса белгиледи.
