Жогорку Кеңештин жалпы жыйынында депутаттар менен билим берүү министри Каныбек Иманалиевдин кайым айтышуусу болду. Депутаттар Надира Нарматова, Шайлообек Атазов, Нурбек Сыдыгалиев жана Айбек Осмонов ЖРТнын босого балын төмөндөтүү керектигин айтышты эле министр “ЖРТнын балын кайра көтөрөбүз”,- деп кесе жооп берди.
“Балдар өтпөй калып, мигрант болуп кетип жатышат. Ошон үчүн алардын шагын сындырбай балын ылдыйлатып берсеңиздер”,- деди Нурбек Сыдыгалиев. Ага билим берүү министри “ЖРТнын балын көтөрбөсөк билимдин баркын көтөрө албайбыз. Биз кайра балды көтөрөбүз. Кээ бир райондордо 83 пайыз окуучулар 110 баллды ала албайт. Ал эми айрым райондордо 87 пайыз. Бул жалаң экиге окуйт дегенди түшүндүрөт”,- деп жооп берди. Министрдин мындай жообуна депутаттар ызылдай түшүштү.
