Жалал-Абад облусундагы сел каптаган аймактарда тазалоо иштери жүрүп жатат. Бул тууралуу Өзгөчө кырдаалдар министрлигинен билдиришти.
Маалыматка ылайык, 14- май күнү саат 02:30 чамасында Базар-Коргон районунда жаандан улам Бешик-Жон айыл өкмөтүнүн Карача айылында сел жүргөн. Селдин кесепетинен Ат-Кол чегинен түшкөн суу агындылары арыктан ашып, 15 турак үйдүн короо сарайларына кирген.
Жабыркагандар жана кыйроолор жок. Жеринде айыл өкмөт кызматкерлери тактоо иштерин жүргүзүүдө. Базар-Коргон райондук куткаруучулар тарабынан короого толуп калган сууларды тазалоо иштери жүрүүдө.
