Эртең, 18-августта Ысык-Көлдүн Чолпон-Ата шаарында популярдуу музыка аткаруучулардын «Мейкин Азия» III эл аралык Ысык-Көл фестивалы башталат. Бул тууралуу Маданият, маалымат, спорт жана жаштар саясаты министрлиги билдирди.
Маалыматка ылайык, фестиваль Кыргызстанды дүйнөлүк маданий жана туристтик мейкиндикке интеграциялоого багыт алып, келечекте популярдуу музыка аткаруучулардын башын бириктирген ири аянтчага айланат.
Иш-чарада 20-августта жыйынтыкталат.
Фестивалга Азия жана Европа өлкөлөрүнөн келген ырчылар катышып, Казакстан, Түркия, Россия, Түштүк Корея, Кытайдан мейман катары келген эстрада жылдыздары улуттук жана дүйнөлүк хит ырларды тартуулайт.
Эл аралык Ысык-Көл фестивалынын максаты маданияттардын диалогу аркылуу маданий мурастарды өнүктүрүү жана сактоо, таланттуу жаш аткаруучуларды табуу жана колдоо, Кыргызстандын туристтик потенциалын өнүктүрүү болуп саналат.
