Кыргызстандык спортчу Мыктыбек Оролбай уулу 19-ноябрда UFCде биринчи беттешин өткөрүп, 2-раундда сербиялык Урос Медичти жеңип алды.
Кыргыз мушкери беттештен кийин Чикагого барып, жердештери менен жолугушкан.
«Келишимге кол койгондон кийин үйгө телефон чалып, алар кабатыр болбошу үчүн мушташкандан 4 күндөн кийин байланышам дедим. Беттештен кийин дароо телефон чалсам, алар ыйлап жатышты. Алар менин бул жөнүндө кыялданганымды жана максатыма жеткенимди билишкен. Валентина Шевченко беттештин алдында жана кийин телефон чалып куттуктады. Рафаэль Физиев мени менен байланышкан жок. Кудай буйруса Рафаэль менен октагондо кезигебиз, мен даярмын», — деди Мыктыбек Оролбай уулу Элнура Молдокадырова менен болгон маегинде.