Казакстандын мурдагы президенти Нурсултан Назарбаевдин кудасы ишкер Кайрат Боронбаев менчигиндеги үч компаниясын Алматанын коммуналдык менчигине өткөрүп берди. Бул маалыматты “Информбюро” агенттиги таратты. Алар соода борбору, бизнес борбору жана фитнес клубдарды караган “F link” компаниясы.
Аталган жаран тергөө менен кызматташып, жалпы 33.75 млрд теңгеге бааланган обьектилерин, 1.4 млрд теңге турган Comfort Hotel Astana мейманканасын быйыл октябрда мамлекеттин эсебине өткөзүп берген эле.
Кайрат Боронбаевди Астана соту сентябрь айында 6 жылга камакка кесип, үй мүлкүн конфискациялаган. Бирок, көп өтпөй баш коргоо чарасы өзгөрүлүп, анын түрмөдөгү мөөнөтү эркиндигин чектеген өкүм менен алмаштырылган. Ал Дарига Назарбаеванын тун уулу Айсултанга кызын берген эле.