Жогорку Кеңештин “Ынтымак” фракциясынын депутаты Балбак Түлөбаев Казакстандын президенти Касым-Жомарт Токаевге кат жазганын айтып, аны жөнөтүү үчүн министрлер кабинетинен жардам сурады. Бул тууралуу эл өкүлү парламенттин бүгункү жалпы жыйынында айтты.
Түлөбаев “Кыргызстандын жараны Эрмек Маркабаев деген жигит эч себепсиз Казакстандын түрмөсүндө жатат. Ушул боюнча кат жаздым эле, жөнөтүү жагын аппарат карап берсин”,-деди.
Ушул жылдын 2-июнунда Казак укук коргоо органдары Алмата шаарындагы “Алтын-Орда” ири базарынын аткаруучу директору Эрмек Маркабаевди кармап, “чөнтөгүнөн наркотикалык зат чыкты”,- деп билдиришкен эле. Кийинчерээк Казакстандык журналист кыздын кокусунан тартып калган видеосу тараган. Анда укук коргоо органдары Эрмек Маркабаевди кармаган учурда наркотикалык затты чөнтөгүнө салып атканын көрүүгө болот.