Украинада Владимир Зеленскийдин Украинанын президенти катары жаңы мөөнөтү жана анын ордуна келе тургандар тууралуу талкуулар башталды. Бир күн мурда ал өзү талапкерлигин коюуну кааларын билдирип, батыш өлкөлөрүнөн 5 миллиард доллар талап кылганын РИА Новости кабарлаган.
Зеленскийдин ордуна талапкерлер активдешкенин NEWS.ru басылмасы жазды. Алардын арасында Киевдин мэри Виталий Кличко, Украинанын Куралдуу күчтөрүнүн башчысы Валерий Залужный, мурдагы президент Петро Порошенко жана экс-премьер-министр Юлия Тимошенко бар.
Басылма Голландиянын Евразия изилдөөлөр борборунун директору, саясат таануучу Владимир Корниловго шилтеме берип, Батыш Украинанын президентин жазында кайра шайлоону көздөп жатканын, бирок миллиондогон украиндер өлкөдөн тышкары жүргөн жана согуш жүрүп жаткан аймакта добуш берүү маселеси чыгарын жазды.
Зеленскийдин президенттик мөөнөтү 2024-жылдын 20-майында аяктайт.
