Жалал-Абад шаардык эпидемияга жана эпизоотияга каршы өзгөчө комиссиясынын чечими менен №2 жана №7 мектептер окуучулар үчүн убактылуу жабылып, аралыктан окутууга өткөрүлдү. Бул тууралуу Билим берүү жана илим министрлиги билдирет.
Ведомствонун билдирүүсүнө караганда, буга кызылча оорусуна кабылган окуучулар көбөйүп кеткени себеп болгон. Жалал-Абад шаарында кызылча илдетине кабылгандардын саны 144 адамды түзгөн. Алардын 85и мектеп курагындагы өспүрүмдөр. Учурда Жалал-Абад облустук клиникалык ооруканасынын жугуштуу оорулар бөлүмүндө кызылча менен ооруган 42 бейтап дарыланууда.