Атактуу жазуучу Милан Кундера 94 жашында Францияда каза болду.
Теги чехиялык француз жазуучусу Милан Кундера 1929-жылы Брно шаарында төрөлгөн. Ал 1953-жылы биринчи китебин чыгарган. 1971-жылы көптөгөн тилдерге, анын ичинде орус тилине которулган «Коштошуу вальсы» романы жарык көргөн.
Кундера 1968-жылы СССРдин Чехословакияга басып киришин сындаганы үчүн сүргүнгө айдалып, кийин 1975-жылы Францияга эмиграцияланган.
1985-жылы Иерусалим сыйлыгына татыган дүйнөгө атагы чыккан жазуучунун «Болуунун чыдагыс жеңилдиги» аттуу китеби үчүн мекенинде 80-жылдардын аягына чейин тыюу салынган.
20-кылымдын эң таасирдүү жазуучуларынын бири катары көрсөтүлгөн Милан Кундера 40 жылдан кийин 1970-жылдары өлкөсүнөн чыгып кеткен Чехиянын жарандыгын кайра алган.
