Кылмыштуу чөйрөдө “Дед Хасан жана прокурор” деген каймана ат менен белгилүү делген 1964-жылы Лейлек районунда туулган Ажибаев Ильяскожо Рахманбедиевич аттуу жаран кармалып, УКМКга алып келинди. Профилактикалык иш – чаранын негизинде ага түшүндүрүү иштери жүргүзүлгөндөн кийин ал элге кайрылуу жасап, крим чөйрөдөн баш тартканын билдирди. “Мурда мыйзам менен жашаган болсом мындан ары деле мыйзамдуулуктун негизинде гана жашайм. Мага тагылган каймана аттарымдан баш тартам”,- деген ал.
Аталган жаран Жогорку Кеңештин депутаты Чыңгыз Ажибаевдин атасы экендиги белгилүү болду. Өткөн жума Сүлүктү көмүр боюнча Азаттык радиосунун иликтөөсү жарыяланган. Анда салык төлөбөгөн ишканаларды УКМК текшерүүгө алгандан кийин “РИО Групп” ишканасы 48.275.171 сом салыкты казынага кайтарган. Ал депутат Чыңгыз Ажибаевдин атасына таандык ишкана болгон.