Бүгүн, 28-октябрда Бишкек шаарында жети акенин портреттеринин көргөзмөсү болот. Бул тууралуу уюштуруучулар билдирди.
Маалыматка караганда, сүрөтчү Абазбек Апиев XVIII-XIX-XX-кылымдарда Ысык-Көл өрөөнүндө жашап өткөн даңазалуу тарыхый инсандар — жети акенин портреттерин жаңыча көз карашта, жаңыча изденүүлөр менен сүрөт өнөрүндөгү реализм, импрессионизм ыкмаларын пайдаланып тартып чыккан.
Бишкек шаарындагы Кыргыз улуттук тарых музейинде саат: 15:00дө өтө турган көргөзмөгө жети акенин портреттери коюлат. Иш-чаралар жыйынтыкталгандан кийин сүрөттөр Ысык-Көл облусунун борбору Каракол шаарындагы акелердин ысымын алып жүргөн жети мектепке белекке берилет.
Белгилей кетсек, портреттердин автору Абазбек Апиев КРдин сүрөтчүлөр союзунун мүчөсү, КРдин сүрөтчүлөр союзунун Ысык-Көл облусундагы филиалынын жетекчиси. Ал 1981-жылы Жети-Өгүз районунун Чырак айылында туулган. С.Чуйков атындагы мамлекеттик сүрөт окуу жайын жана КГУСТА университетин аяктаган. 2009-жылы Орто Азиядагы орчундуу көргөзмөлөрдүн катарына кирген жана ислам тарыхында алгачкы жолу Мухаммед пайгамбарга тиешелүү буюмдарды живопись жанрында чагылдырган “Ыйык аманаттар” чыгармалар жыйнагын даярдап, бир катар көргөзмөлөрдү уюштурган.