Бишкекте XXII Олимпиада оюндарынын марафондук чуркоо боюнча коло байге ээси Сатымкул Жуманазаровдун жаркын элесине арналган жарым марафон өттү. Бул тууралуу Бишкек мэриясы билдирди.
Маалыматка ылайык, марафонго Кыргызстан, Беларусь, Азербайжан, Германия, Италия, Россия, Казакстан, Түркия, Түркмөнстан, Украина, Өзбекстан, Канада, Греция, Чехия жана АКШ сыяктуу өлкөлөрдөн 1 миң 500дөн ашык жөө күлүк катышты.
Жарыштын катышуучулары 21,1 чакырым, 10 чакырым (чуркоо жана басуу) жана 3 чакырым аралыкты басып өтүштү. Ошондой эле балдар үчүн 1 чакырымдык жол уюштурулуп, алар ата-энеси менен бирге чуркады.
Белгилей кетсек, жарым марафон Бишкек мэриясы, КР Жеңил атлетика федерациясы, «Эл аралык марафондун дирекциясы» коомдук бирикмеси жана мэриянын дене тарбия жана спорт, туризм жана жаштар иштери боюнча департаменти тарабынан уюштурулду.
Спорттук мелдештин жыйынтыгы боюнча 21,1 жана 10 чакырым аралыкта жеңүүчүлөр атайын медалдар, дипломдор жана баалуу белектер менен сыйланды.
