Электр самокаттарды жана ошого окшогон эмеректерди тебүү боюнча мыйзам даярдалып жатат. Анын демилгечиси Жогорку Кеңештин депутаты Марлен Маматалиев.
“Аны колдонгондор көбүнчө өспүрүмдөр. Бирок, бара – бара кырсыктар көп болуп жатат. Бүгүнкү күндө электр самокаттарды ижарага бергендер же, алып колдонгондор анын эрежесин билишпейт. Мындан улам бар болгон жол коопсуздугу боюнча мыйзамга анча мынча өзгөртүүлөрдү киргизип коюшубуз керек”,- дейт депутат. Анын айтымында, электр самокаттары же ошого окшогон эмеректерди жөнгө салуучу эреже кирет. Ага байланыштуу аталган эмеректер атайын веложолдордо, жолдун четтеринде, тротуарларда жүрүшү керек. Ошондо да, алар жөө жүргүнчүлөргө жол бошотууга мажбур. Мыйзам кабыл алынып калса, жергиликтүү бийлик вело жүрүш үчүн жолдорду жана тротуарларды салганга милдеттенет.
