Кыргызстанда биринчи жолу «Бишкек эл аралык кинофестивалы» өтөт. Бул тууралуу Маданият, маалымат, спорт жана жаштар саясаты министрлиги билдирди.
Иш-чаранын расмий ачылышы бүгүн, 17-ноябрда Токтогул Сатылганов атындагы Кыргыз улуттук филармониясында саат 19:00 башталат.
Иш-чарада эки башка категорияда сынак юуштурулуп, эл аралык кино сынакта 10 тасма, улуттук сынакта 8 тасма ат салышат.
Сынактардын калыстар тобуна дүйнө кино өндүрүшүндө белгилүү ысымдардан Семих Капланоглу, Филипп Чеа, Елена Дулгеру, Пак Сон Ён жана Гүлсара Ажыбекова кирип, фестивалдын башкы сыйлуу коногу катары Ч.Айтматовдун “Кызыл жоолук жалжалым” тасмасында башкы каарман актриса Түркан Шорай келет.
Фестиваль президенттин «Улуттук киноиндустрияны өнүктүрүү жана кинематографияны мамлекеттик колдоо системасын өркүндөтүү боюнча чаралар жөнүндө” Жарлыгынын негизинде уюштурулуп, Кыргыз эл жазуучусу Чыңгыз Айтматовдун 95 жылдыгына арналып өткөрүлүүдө.