Иран өлкө боюнча балдардын массалык ууланышына шектелген 100дөн ашуун адамды камакка алды. Жабыркагандардын басымдуу бөлүгү кыздар.
Генерал Саид Монтазеролмехди ирандык маалымат каражаттарына берген комментарийинде 110 киши камакка алынганын жарыялады. Алар өлкөдөгү массалык ууланууну уюштурууга катыштыгы бар деп шектелүүдө.
Ирандын 25 аймагында беш миңден ашуун бала массалык ууланууга кабылган. Тегерандан 125 чакырым түштүк-батышта жайгашкан Кум провинциясында биринчи жолу массалык уулануу фактылары катталган. Ал жерде жергиликтүү Нур Язданшахр консерваториясынын 18 студенти газга ууланып, ооруканага жаткырылды.
Марттан бери мындай кол салуулардын саны кескин өстү. Сырдуу окуянын так себеби тактала элек.
