Кыргызстандын футбол боюнча улуттук курамасынын Азия кубогунун финалдык баскычындагы атаандаштары белгилүү болду.
11-майда Дохада (Катар) турнирдин финалдык бөлүгүнө чүчү кулак ташталып, анда 24 команда 4 командадан 6 тайпага бөлүнгөн.
Кыргызстандын курама командасы Сауд Аравия, Таиланд жана Оман курама командалары менен бирге тайпага кирди.
Командалар бири — бири менен бир жолу ойношот, андан ары 16 команда плей-оффтук баскычка чыгат. Мындан ары дагы үчүнчү орунду ээлегендердин арасында эң жакшы жыйынтык көрсөткөн дагы 4 команда плей-оффко жолдомо алат.
Эске салсак, турнир Катарда 2024-жылы 12-январдан 10-февралга чейин өтөт. Кыргызстандын курама командасы Азия Кубогунда өз тарыхында экинчи жолу ойнойт.
