Кыргызстандын курулуш жана архитектура министри Нурдан Орунтаев кызыл кулактардын торуна чалынбай эле лицензияны өзү жетектеген министрликтен алууга болоорун билдирди.
“Азыр дале болсо, мурда алынган лицензияларды 200-300 миң долларга сатып жатышат. Эгерде кимдир бирөөгө лицензия керек болсо, 6 гана документ тапшырып, 17.200 доллар төлөсөңүз, эч кандай бюрократия жок эле 10 күндүн ичинде лицензияңызды аласыз. Ал эми 17.200 доллар мамлекеттин эсебине которулат”,- деди министр.
Былтыр 800гө жакын курулуш компанияларынын лицензиялары токтотулган. Нурдан Орунтаев чет элдиктерди алдап, лицензия саткандар боюнча укук коргоо органдарына кайрылышаарын маалымдады.
