Жакында Кыргызстан, Өзбекстан жана Тажикстан көп жылдан бери чечилбей келген чек ара маселесинде өз ара түшүнүшүүгө жетишти. Бул тууралуу Казакстан Республикасынын президенти Касым-Жомарт Токаев Астанада өткөн Казакстан элинин Ассамблеясынын сессиясында билдирди.
«Тарыхый келишимге кол коюлду деп айтууга болот. Биз муну чоң жетишкендик катары баалайбыз. Биз дайыма колдоп келген боордош мамлекеттер үчүн кубанычтабыз»,-деген президент Токаевдин айтымында, казак эли байыртадан бери коңшуларына чоң урмат менен мамиле кылган.
«Коңшуну кабыл алуу — Кудай алдындагы карызды кайтаруу” деген макалда биздин ишенимибиз жана салт-санаабыз чагылдырылган. Бул ата-бабаларыбыздан калган осуят, энелерибизден өткөн сапат. Элдин коңшуга болгон урматы азыркы күнгө чейин уланууда. Коңшулар улутуна, динине жана тилине карабастан, жалпы максаттар менен жашашат»,-деди ал.
«Алатоодо жашаган кыргыздар биздин бир туугандарыбыз. Байыртадан бери өзбектерди өз бир тууганыбыздай сыйлап келебиз. Түркмөндөр — биздин тууган эл. Биз орток ата-бабаларыбызды ардактап келебиз. Биз Каспий деңизи аркылуу байланып турган Азербайжан элине да чын ыкластан жакшы көрүү менен мамиле кылабыз»,-деди Токаев.
