8°
Кыргызстандагы чыгармачыл союздарга долбоорлорду ишке ашыруу үчүн 20 млн сомдон бөлүнөт. Бул тууралуу Маданият, маалымат, спорт жана жаштар саясаты министрлигинин басма сөз кызматынан билдиришти.
Маалыматка ылайык, ведомствонун өткөн жылдагы ишинин жыйынтыгы жана үстүбүздөгү жылдагы ишмердүүлүгүнүн артыкчылыктуу багыттары каралган коллегияда министр Алтынбек Максутов Композиторлор союзунун төрагасы Турдубек Чокиев, Театр ишмерлер союзунун төрагасы Жаныш Кулмамбетов, Улуттук жазуучулар союзунун төрагасы Нурлан Калыбеков, Кинематографисттер союзунун төрагасы Таалайбек Кулмендеев жана Сүрөтчүлөр союзунун төрагасы Жакшыбек Жунушов менен жолукту.
Жолугушуунун жүрүшүндө чыгармачыл союздардын көйгөйлөрү көтөрүлүп, анын ичинен имарат, китептин ички мазмундары, гонорардык система сыяктуу маселелер жана аларды чечүү жолдору талкууланды.
Министр Алтынбек Максутов мамлекеттин казынасынан ар бир союзга 20 млн сом акча каражаты каралып жатканын, ага ылайык, ар бир тармак долбоорлорду даярдап келүү тапшырмасын берди.
